Li ilegal pou yo fè yon moun peye yon lajan pou yo anboche l. Ou ka gen dwa pou w fè yo remèt ou lajan sa yo te fè w peye pou yo anboche w la. Konpayi yo pa ta dwe kite moun k ap fè rekritman yo fè moun peye pou sa. Si w te peye yon moun k ap anboche w lè w te nan peyi w, konpayi a dwe remèt ou tout lajan sa a nèt nan premye lajan w touche a.
Si w panse konpayi w ap travay la pa t respekte kondisyon sa yo, ou ka kontakte Depatman Salè & Lè a nan telefòn: 1-866-487-9243.
Ou ka kontakte anbasad oswa konsila ki pi pre a nan peyi w tou. Ministè travay Etazini kolabore de prè ak anbasad ak konsila ki nan Meksik, Gwatemala, Salvadò ak Ondiras pou ede travayè yo konn dwa yo e pou yo depoze plent.
Si w ap travay nan kad pwogram viza H-2A oswa H-2B a, oswa si Lwa pou Pwoteksyon Migran ak Travayè Agrikilti Sezonye ("MSPA") a konsène w, konpayi w ap travay la dwe ba w yon dokiman ekri nan yon lang ou konprann ki dekri kondisyon travay ou a. Dokiman sa a ta dwe gen enfòmasyon sou salè w ak tout lajan konpayi a retire nan chèk ou.
Ou ka al nan anbasad oswa konsila ki nan peyi w la lè w al nan yon entèvyou pou w mande viza. Ou ka pale tou ak ministè travay ki nan peyi w la. Ou ka rele Depatman Salè & Lè a nan telefòn tou: 1-866-487-9243.
Travayè ki nan pwogram travay pwovizwa yo gen dwa:
- Pou yo resevwa enfòmasyon ki kòrèk, ki ekri konsènan salè, kantite lè, kondisyon travay, ak avantaj travay la ofri;
- Pou yo resevwa enfòmasyon nan yon lang travayè yo konprann;
- Pou travayè ki nan pwogram viza H-2A ak H-2B yo, pou yo resevwa enfòmasyon sa a anvan yo jwenn viza a (pou anpil travayè) men se p ap apre premye jou travay la (pou lòt travayè).
Si konpayi w ap travay la pa bay bagay sa yo, oswa si w gen kesyon, rele nou nan 1-866-487-9243 oswa ale sou www.dol.gov/agencies/whd. Li pa legal pou yo revoke w oswa tire reprezay sou ou paske w kontakte DOL oswa w pran dwa k pou ou. Sèvis yo gratis e yo konfidansyèl.
Pou w verifye si yo te voye yon aplikasyon pou sètifika travay pwovizwa nan Ministè Travay (DOL), ou ka ale sou seasonaljobs.dol.gov epi chèche konpayi a ak adrès la. Biwo ki Bay Sètifika pou Travay Etranje nan DOL la pibliye tou yon lis ajans rekritman travayè etranje chak ane pou pwogram H-2B a. Ou ka chèche ajans rekritman an ak nimewo dosye ki asosye avè yi a pou w jwenn travay y ap chèche moun pou yo a.
Pou w jwenn plis enfòmasyon, ou ka al gade Lis Kontraktè Agrikòl ki Anrejistre Daprè Lwa pou Pwoteksyon Migran ak Travayè Agrikòl Sezonye a (MSPA). https://www.dol.gov/agencies/whd/agriculture/mspa/farm-labor-contractors
Nan pwogram H-2A a, konpayi yo gen obligasyon pou yo bay travayè yo lojman gratis e ki an sekirite. Yo dwe ba w transpò chak jou ki gratis e ki an sekirite tou epi bay manje oswa kizin pou w fè pwòp manje w. Konpayi a ka fè w peye pou manje li ba w yo men li pa ka fè w peye pou lojman.